කොලොම්බියාවේ දැවැන්තම බිලිඳා ලෙස විරුදාවලි ලැබ සිටින මෙන්ඩෝසාගේ මව කියා සිටින ආකාරයට සාමාන්‍ය නිරෝගී බරකින් යුතුව ඉපදුණු සිය පුතු අට මසක් වැනි කෙටි කාලයකදී මෙතරම්  තරබාරු වීමට හේතුවී ඇත්තේ ඇයගේම නොදැනුවත්කම නොසැලකිල්ලයි.
සිය පුතු අඬන වාරයක් පාසා ඔහුට කිරි හා ආහාර ලබා දීමට ඉයුනිස් පෙළඹී තිබුණේ උපතේ සිටම කාංසාවෙන් පෙළුණු සිය බිලිඳු පුතුව නළවා ගත හැකි වූ පහසුම මාර්ගය එය වූ නිසයි. ඉපදුණු දින සිට අධික ශරීර බර හේතුවෙන් හටගත් සංකූලතාවන්ට ප්‍රතිකාර ලබා ගැනීම සඳහා ඔහුව කීප වරක්ම රෝහල් ගත කිරීමටද සිදුව තිබිණි. ශරීරයේ අධික බර ප්‍රශස්ත මට්ටමකට ගෙන ඒම සඳහා ඔහුව සැත්කමකට ලක් කිරීමට සිදුවුවද ඊට පෙර සැත්කමට මුහුණ දීමට සුදුසු මට්ටමකට ඔහුගේ ශරීරයේ බර පත් කිරීමට අවශ්‍ය ප්‍රතිකාර ලබා දිය යුතු බව චබි හාට්ස් ආයතනයේ අධ්‍යක්ෂ එල්සැල්වදෝර් පැ‍ලේෂියෝ ගොන්සා‍ලේසේගේ නිගමනය වී තිබේ.
සැත්කම්වලින් පමණක් සෑහීමට පත් විය නොහැකි බවත් සැන්ටියානෝගේ ඉදිරි ජීවිත කාලය පුරාවටම නිසි ශරීර බරක් පවත්වාගෙන යාම සඳහා ආහාර, අධ්‍යාපනය හා  කායික ව්‍යායාම යන සියල්ල මනාව සමබර කෙරුනු දිගුකාලීන ප්‍රතිකාර ක්‍රමයක් පවත්වාගෙන යාම අවැසි වනු ඇත. නැතහොත් අධික බර හේතුවෙන් ළමා වියේදීම ඔහුට සන්ධි ආබාධ, දියවැඩියාව, අධික රුධිර පීඩනය වැනි රෝග වැළඳීමේ අවදානමට මුහුණ දීමට සිදු වනු ඇත.
  ඔසවාගෙන යාමට නොහැකි තරම් අධික බරකින් යුතු  බිලිඳු පුතු හේතුවෙන් නිවසටම කොටු වී සිටි ෆැන්ඩිනෝ සිය පුතුගේ රෝගාබාධය වෙනුවෙන් වෛද්‍යවරුන් ලබා දෙන්නා  වූ සෑම උපදෙසක්ම එයාකාරයෙන්ම පිළිපැදීමට සූදානම්ව සිටින්නේ සිය පුතු සාමාන්‍ය දරුවෙකුගේ තත්ත්වයට පත් කිරීමට එම ප්‍රතිකාර සමත් වනු ඇතැයි යන සුබවාදී බලා‍පොරොත්තුව පෙරදැරිවය.

ප්‍රියන්ති රුද්‍රිගු