මෙවර පළාත් සභා මැතිවරණයේ පරාජයට පත්වූ අපේක්ෂකයෝ අතර දකුණු පළාත් සභාවේ හිටපු විපක්ෂ නායකවරයා, හිටපු පාර්ලිමේන්තු  මන්ත්‍රීවරු  මෙන්ම මැති ඇමැතිවරුන්ගේ පුත්තුද ජනප්‍රිය  චරිත රැසක් සමග හිටපු පළාත් සභා මන්ත්‍රීවරු තිස්දෙනෙක් පමණ සිටිති.

දකුණු පළාත් සභාවේ හිටපු විපක්ෂ නායක සිරි  විජේවික්‍රම මහතාට මෙවර මාතර එජාප ලැයිස්තුවේ  හිමි වී ඇත්තේ හය වැනි තැනය.  

එනමුත් මාතරෙන්  එජාපයට හිමි වූයේ මන්ත්‍රී ආසන හතරක් පමණි.  මාතර දිස්ත්‍රික්කයෙන් තරග කළ  හිටපු එජාප පාර්ලිමේන්තු මන්ත්‍රීවරයකු වන එච්. ආර්. විමලසිරි මෙන්ම අනූ හතරේදී මහ මැතිවරණයේදී  ජවිපෙ ලැයිස්තුවෙන් තේරුණු පාර්ලිමේන්තු මන්ත්‍රීවරයා ලෙස සැලකෙන ජනිත් විපුලගුණද පරාජයට පත්වී තිබේ. ඔහු මෙවර මැතිවරණයට ඉදිරිපත් වූයේ ප්‍රජාතන්ත්‍රවාදී පක්ෂයෙනි. එමෙන්ම ජවිපෙ හිටපු පාර්ලිමේන්තු මන්ත්‍රීවරිය  වන අන්ජාන් උම්මාටද හිමිවූයේ  පරාජයය. ඇය මෙවර  ඉදිරිපත්  වූයේ එජාප නියෝජනය කරමින් ගම්පහටය.

මේ අතර හිටපු එජාප පාර්ලිමේන්තු මන්ත්‍රීවරු දෙදෙනෙක් වන එඩ්වඩ් ගුණසේකර හා නිමල් ආර්. පීරිස් බස්නාහිර පළාත් සභාවට තේරී පත්ව සිටිති. එඩ්වඩ් ගුණසේකර  එජාපයෙන් ගම්පහ  දිස්ත්‍රික්කයටද  නිමල් ආර්. පීරිස් ප්‍රජාතන්ත්‍රවාදී පක්ෂයෙන් කොළඹ දිස්ත්‍රික්කයටද තේරී පත්ව ඇත.

මැති ඇමැතිවරුන්ගේ දූ දරුවන් රැසක් පළාත් සභා දෙකින් ජය ලබන විට එජාප ලැයිස්තුවෙන් ගාල්ලට ඉල්ලූ හිටපු ඇමැතිවරුන් දෙදෙනෙකුගේ පුතුන් දෙදෙනෙකු  පරාජයට පත්ව ඇත. ඒ රූපා කරුණාතිලකගේ පුත් සංජීව  කරුණාතිලක හා හේමකුමාර නානායක්කාරගේ පුත් තාරක නානායක්කාරය. එසේම ‍‍‍ජ්‍යෙෂ්ඨ ඇමැති ඒ.එච්.එම්. ෆවුසි මහතාගේ පුතා වන නවුසර් ෆවුසිද කොළඹ දිස්ත්‍රික්කයෙන්   පරාජයට පත්ව තිබේ. ඔහු කොළඹ දිස්ත්‍රික් සන්ධාන ලැයිස්තුවේ නියෝජ්‍ය  නායකයාය.

ආණ්ඩුවේ පාර්ශ්වකරුවන් ලෙස කටයුතු කරන කොමියුනිස්ට්, සම සමාජ, ජාතික හෙළ උරුමය මෙන්ම ජාතික නිදහස් පෙරමුණේ අපේක්ෂකයන් රැසකට හිමි වී ඇත්තේ පරාජයය. හෙළ උරුමය නියෝජනය කළ තෙබුවන පියනන්ද (කළුතර), මධුමාධව අරවින්ද (ගම්පහ), විමල් වීරවංශ ඇමැතිවරයාගේ ජ.නි.පෙ. නියෝජනය කළ ඉන්ද්‍රජිත් විජේවර්ධන (ගාල්ල), ලලන්ත ගුණසේකර (ගම්පහ), නෙළුන් දර්ශන මල්ලව (ගම්පහ) ඒ අතර වේ.

රතුපස්වල ජල ප්‍රශ්නය වෙනුවෙන් පෙනී සිටි ප්‍රසිද්ධ  චරිත වන නීතිඥ උපුල් දේශප්‍රිය හා ප්‍රමිත හෙට්ටිආරච්චි එජාප  නියෝජනය කරමින් ගම්පහෙන් ඡන්දය ඉල්ලුවද ඔවුන්ටද හිමිවූයේ පරාජයය. ඉකුත් කාලයේ දැඩි ආන්දෝලනයට ලක්වූ පළාත් සභා මන්ත්‍රීවරයකු වූ මේජර් අජිත් ප්‍රසන්න (ගාල්ල) මෙන්ම කපිතාන් ප්‍රදීප් පෙරේරා (ගම්පහ)ටද අන්ත පරාජයක් හිමි වී තිබේ.

විසිපස් වසරක් අඛණ්ඩව පළාත් සභාව නියෝජනය කළ කොමියුනිස්ට් පක්ෂයේ ගා. දේනෙත්ති (ගාල්ල) ශ්‍රීලනිප ගම්පහ දිස්ත්‍රික් සංවිධායක රෙහෙනසිරි වරාගොඩ, කැලණිය එජාප සංවිධායක බෙවන් පෙරේරා, අත්තනගල්ල  එජාප සංවිධායක  චන්ද්‍රසෝම පරණලාල් උපුල්දේව වනවාසල (ගම්පහ)   යන අයද පරාජයට පත්වූ අපේක්ෂකයන් අතරේ සිටිති.

කොළඹ දිස්ත්‍රික්කයේ සන්ධාන ලැයිස්තුවෙන් තරග කළ අශෝක ලංකාතිලක, මෙන්ම කොළඹ   දිස්ත්‍රික්ක ශ්‍රීලනිප  සංවිධායක  රේණුක පෙරේරා, දයාකාන්ත පෙරේරා, සරත් සුමනසේකර යන මන්ත්‍රීවරුන්ද පරාජයට පත්වී ඇත.

මිහිරි ෆොන්සේකා

මාර්තු 21 වැනි දින සවස 2.30 වන විටත් මාතර වෙරළේ බංකු මත වැටකෙයියා පඳුරු අසල සහ ගල් වැටි මත කුඩවලින් හිස් ආවරණය කරගෙන කර වටා දෑත් පටලවාගෙන ආදර බස් තෙපළන පෙම්වතුන්ගෙන් පිරී තිබිණ.

මේ වන විට මාතර ප්‍රදේශ‍ෙය් පොලිස් පරීක්ෂකවරයකුගේ 24 හැවිරිදි පුත්‍රයා වන ‘සම්පත්’ සිය පෙම්වතිය වන අකුරැස්ස පිටබැද්දර ප්‍රදේශයේ ‘සමන්මලී’ ද පෙම්රස විඳගැනීම සඳහා මාතර තානායම පිටුපස වැටකෙයියා ගාලක මුලකට බරදෙමින් ආදර ලෝකයේ අතරමං වී සිටියහ.

මේ අවස්ථ‍ාවේ කළු කලිසමකින් සහ සුදු ෂර්ට් එකකින් සැරසුණු පුද්ගලයකු පෙම්වතුන් යුවළ අසලට පැමිණ ඔවුන් හිසලාගෙන සිටි කුඩය ඇද රකුසු වෙසින් ඔවුන් දෙස බලා “වැල්ලේ අශෝභන ලෙස හැසිරෙන්න තහනම්” බව දන්නේ නැද්ද? මා පොලිස් පරීක්ෂකවරයෙක්. වහාම ‍පොලිසියට යන්න අර කාර් එකේ නගිනවා. කියමින් තානායම අසල නතර කර තිබූ කළු පාට කාර් එකකට මෙම යුවළ නංවාගත්හ.

මෙම යුවළ කාර් එකට නංවාගත් හොර ‍ෙ‍පාලිස් පරීක්ෂකවරයා වාහනය මාතර දුම්රියපොළ දෙසට පදවා ‘සම්පත්'ට කාරයෙන් බැස පිටුපස නොබලා දුවන ලෙසට නියෝග කොට ‘සමන්මලී’ සමඟ නැවත මාතර නගරය දෙසට රිය පදවන්නට විය. රිය තුළ තනිවූ ‘සමන්මලී’ තමා පොලිසියට බාර දේවිය යන බියෙන් ඇළලී සිටියාය.

‘සමන්මලී’ ගේ බිය තවත් වැඩි කරමින් බොරු පොලිස් පරීක්ෂකවරයා කාරයේ සියලු දොරගුළු ලොක් කර විදුලි වේගයෙන් මාතර උයන්වත්ත පිටිපස මාර්ගයෙන් තංගල්ල දෙසට ධාවනය කර කිසිවෙකුත් නැති පාළු ස්ථානයක දී ‘සමන්මලී’ අමාරුවේ දැම්මේය. කාමාතුරයාට බිලිවූ ඇයගේ ඉකිබිඳුමේ වේදනාව කිසිවෙකුට නෑසුණේ ඇගේ අවාසනාවටය.

කාමාතුරයා ‘සමන්මලී’ පාළු ප්‍රදේශයක අතරමං කොට සැණෙකින් පලා ගියේය. අසරණ වූ මුවැත්තියක මෙන් ‘සමන්මලී’ බස් රථයකට ගොඩවී මාතරට පැමිණ මාතර කොට්ඨාස ළමා හා කාන්තා කාර්යාංශයේ ස්ථානාධිපති ‍ෙපාලිස් පරීක්ෂක වරුණි බෝගහවත්ත මහත්මිය ඉදිරියේ තමාට වූ ඇබැද්දිය කඳුළු පිරි දෙනෙතින් හෙළි කළාය.

විශාල පිරිසක් ගැවසෙන මාතර මුහුදු වෙරළේ මහ දහවල් සිදුවූ මේ අවාසනාවන්ත සිද්ධියට සවන් දුන් ‍බෝගහවත්ත මහත්මිය මාතර ජ්‍යෙෂ්ඨ පොලිස් අධිකාරි දේශබන්දු තෙන්නකෝන් මහතාට මෙය දැනුම් දුන්නාය. ඒ අනුව සිද්ධියට සම්බන්ධ සැකකරු සහ කළුපාට මෝටර් රථය අත්අඩංගුවට ගැනීමට කටයුතු කරන ලෙස නියෝග කෙරිණි.

මේ අනුව බෝගහවත්ත මහත්මිය අදාළ දිනයේ එකී වේලාවේ මාතර නගරය පසුකර ගිය කළුපාට කාර් එකේ ‍හෝඩුවාවක් දැනගැනීම සඳහා මාතර නගරයේ සිට තංගල්ල දක්වා ඇති සියලු රාජ්‍ය ආයතන හා ව්‍යාපාරික ස්ථානවල සවිකර ඇති CCTV කැමරා දත්තයන් පරීක්ෂා කිරීමේ මෙහෙයුමක් ක්‍රියාවට නැංවූ‍වාය.

මෙම පරීක්ෂාවේදී මාතර හැටන් නැෂනල් බැංකුවේ කැමරා පද්ධතියේ මෙම කළුපාට කාරය සටහන්ව තිබූ අතර එහි වර්ගය සහ අලවා තිබූ වෛද්‍ය ප්‍රථමාධාර ලාංඡනය ද පොලිස් පරීක්ෂණවලට ඉමහත් පිටිවහලක් විය.

සැකකාර කාමාතුරයා නිදැල්ලේ සිටීම මාතර වෙරළේ පෙම්සුව විඳින තරුණියන්ට බලවත් තර්ජනයක් බව තේරුම්ගත් බෝගහවත්ත මහත්මිය මෙම මෙහෙයුමේ දෙවන අදියර ක්‍රියාවට නැංවීමට වහා පියවර ගත්තාය.

ඒ අනුව ඉදිරියටත් තවත් තරුණියන් බිලිගැනීමට සැකකරු මාතර වෙරළට එන බව රාජකාරි දිවියේ අත්දැකීම් මඟින් තේරුම්ගත් පොලිස් පරීක්ෂකවරිය මාතර වෙරළේ ගැවසෙන සියලුම පෙම්වතුන් ද මහජනතාව සහ ව්‍යාපාරික ප්‍රජාව ද දැනුවත් කළාය. ප්‍රථමාධාර ලාංඡනය සහිත කළුපාට කාර් එක මාතර වෙරළ පාරට පැමිණියහොත් වහාම ‍පොලිසියට දන්වන ලෙසට ඔවුන් දැනුම්වත් කෙරිණි.

මේ සිද්ධිය වී යාන්තම් පැය 48ක් ගත වූවා පමණි. පසුගිය 23 දින සවස 4.30ට පමණ මාතර පොලීසියට පැමිණි අයෙකු මෙවන් මෝටර් රථයක් වෙරළ ආසන්නයේ ගැවසෙන බවට තොරතුරක් සැපයීය.

මේ වන විට සැකකරු වෙරළේ පෙම් සුව විඳින ජෝඩු අතරින් හැඩකාර හුරුබුහුටි තරුණියක් දෙස කාමාතුර බැල්මක් හෙළමින් සිටියේය. ඇය පැහැරගෙන ගොස් දූෂණය කිරීම සඳහා ඉලක්කය ගනිමින් සිටින අවස්ථාවක් ලෙස සැක කළ පොලිස් පරීක්ෂක වරුණි බෝගහවත්ත, පො.සැ. 55850 සුමතිපාල, පො.කො. 37982 චන්දන, පො.කො.රි. 28630 පුෂ්පකුමාර, කා.පො.කො. 5282 චන්ද්‍රා ප්‍රමුඛ පොලිස් නිලධාරීන් පිරිස මාර්ගයේ ගමන් කරමින් සිටි වාහනයක නැගී වෙරළ පාරට පැමිණියහ.

ඒ වන විට ගොදුරට ඉව අල්ලමින් ගමන් කරන වාහනය දැක ඒ පිටුපස ලුහු බැඳ හරස් කර වාහනය නතර කරගත් අන්දම හින්දි චිත්‍රපටයක රූගත කිරීමකට සමාන විය. මෙම අවස්ථාවේ පොලිස් පරීක්ෂකවරිය වාහනයට ඇතුළු වී සැකකරු මෙල්ල කරගෙන අත්අඩංගුවට ගත් අතර මෙම සිද්ධියට සම්බන්ධ පෙම්වතා වන ‘සම්පත්’ ද සැකකරු හඳුනාගෙන ඇත.

මේ අතර සැකකරු වාහන‍ෙය් ඉදිරිපස අලවා තිබූ ප්‍රථමාධාර ලාංඡනය පොලීසියට පෙන්වමින් තමා වෛද්‍යවරයකු බව කියමින් පොලිස් පරීක්ෂකවරියගේ රාජකාරියට බාධා කරමින් පලා යාමට තැත් ක‍ළත් ඔහුගේ අත්වලට විලංගු වැටිණි.

මොහු වලස්මුල්ල ප්‍රදේශයේ දිස්ත්‍රික් වෛද්‍ය නිලධාරිනියකගේ පෙම්බර සැමියාය. වයස අවුරුදු 39ක් වූ මේ කාමාතුරයා බරවකුඹුක ප්‍රදේශයේ පදිංචිකරුවකු වන අතර අවුරුදු 01, 03 යන වයස්වල පසුවෙන දරුවන් දෙදෙනෙකුගේ පියෙකු ද විය. සිය වෛද්‍ය බිරිය‍ සේවයට ගිය අතරේ ඇයගේ නිල රියෙන් ගොස් කාමාපරාධවල යෙදීම ඔහු තම දෛනික පුරුද්දක් කරගෙන සිටි බවට තොරතුරු හෙළි විය.

ඔහුගේ රථයේ තිබී උපත්පාලන කොපු, කෑමබීම ඇඳුම් පැලඳුම් සහ විවිධ සිම් කාඩ්පත් හසුවීම ද සැකකරුගේ කල්ක්‍රියාව තේරුම් ගැනීමට හොඳ සාධක විය.

පොලිස් ප්‍රශ්න කිරීමේදී තමා බරවකුඹුක ප්‍රදේශයේ සිට ලොතරැයි පතක් ගැනීමට මාතරට පැමිණි බව කීවත් මොහුගේ දිනචරියාව ගැන දැන ගැනීමට පොලිසියට වැඩිවෙලාවක් ගියේ නැත. සැකකරු අතින් කරදරයට පත් තවත් තරුණියන් ඇත්නම් පොලිසියට පැමිණ තොරතුරු සපයන ලෙසත්, පොලිස් පාට් දමමින් තරුණියන් පැහැරගන්නා මෙවන් සල්ලාලයන්ගෙන් පරිස්සම් වන ලෙසත් පොලිසිය තරුණියන්ගෙන් කාරුණික ඉල්ලීමක් ද කළේය.

සුවහසක් රෝගීන් සුවපත් කරමින් රටටම සේවය කරන වෛද්‍යවරියකගේ ස්වාමිපුරුෂයා අහිංසක තරුණියන්ගේ ජීවිත විනාශ කරමින් එම තරුණියන් සදාකල්හිම මානසික රෝගීන් බවට පත්කිරීම මොනතරම් අවාසනාවන්ත තත්ත්වයක්ද?

පැය 48ක් යාමට මත්තෙන් සැකකරු සහ වාහනය අත්අඩංගුවට ගැනීමට නිරතුරුව උපදෙස් දෙමින් කටයුතු කළ මාතර ජ්‍යෙෂ්ඨ පොලිස් අධිකාරි දේශබන්දු තෙන්නකෝන් මහතාගේ ක්‍රියාකලාපයට මාතර නගරයේ ජනතාවගේ ප්‍රශංසාව හිමිවිය.

මාතර වෙරළේ කාමාතුරයා අත්අඩංගුවට ගැනීමට නිර්භීතව කටයුතු කළ පොලිස් පරීක්ෂක වරුණි බෝගහවත්ත මහත්මිය ඇතුළු නිලධාරීන් පිරිස මුළුමහත් පොලිස් දෙපාර්තමේන්තුවට අත්කර දුන් ගෞරවය ද සුළුකොට තැකිය නොහැකිය.